Fasademateriala er tilpassa eksisterande materialbruk ved sjukehuset.

- Vi hadde ei stor utfordring framfor oss, men vi har klart å gjere det vi skal utan å komme i konflikt med sjølve drifta av sjukehuset. Det har heile tida vore førsteprioritet, seier byggeleiar for Erstad og Lekven Bergen AS, Einar Elde.

170 millionar kroner

170 millionar kroner er prislappen på byggearbeidet som aukar nettoarealet ved Førde sentralsjukehus med om lag 2.500 kvadratmeter. Bruttoarealet stig med rundt 4.200 kvadratmeter. No er byggearbeidet i sluttfasen og når dei nye avdelingane blir tekne i bruk i byrjinga av april neste år har Førde sentralsjukehus fått tre nye lamellar som gir byggherre Helse Førde utvida poliklinisk areal og nye kjærkomne kontorlokale til legane. I tillegg har dei fått eit nytt inngangsparti og 40 nye parkeringsplassar til tilsette, pasientar og besøkande. Deler av det eldste bygget blir også rehabilitert når nokre avdelingar blir flytta frå gamle deler av sjukehuset til dei nye avdelingane.

- Det har vore spesielt å drive byggeri på eit sjukehus som er i vanleg drift. Vi har heile vegen vore nøydde til å ta omsyn til både pasientar og dei tilsette ved sjukehuset. Det har stilt høge krav til oss, både med tanke på reinhald og på å halde støyen nede på eit minimumsnivå. Det seier seg sjølv at du må vere ekstra påpasseleg når du arbeider rett over intensivavdelinga ved eit sjukehus, seier Elde.

Utstrekt bruk av glas skapar eit lyst og luftig preg. Slike små og store lunger finn ein fleire stader i tilbygga ved sentralsjukehuset i Førde.

Reint bygg

Spesielt støyande arbeid, som til dømes pæling, har blitt lagt til dei mest gunstige tidspunkta i døgeret og i veka, og reinhald på byggeplassen har blitt priortert svært høgt.

- Mykje av arbeidet har føregått i deler av sjukehuset der det framleis har vore normal drift. Til dømes går alle tekniske føringar frå det nye bygget og ned i eksisterande bygg. Somme gonger har vi gått gjennom fleire etasjar, og heilt ned i kjellaren. Alt det elektriske er mellom anna henta derifrå, seier Elde.

For å halde byggeplassen så rein som mogleg, har det blitt brukt sentralstøvsugar under arbeidet.

- Sentralstøvsugaren har stått utanfor byggeriet, og vi fekk lagt opp røyr inni bygget med uttak overalt. Sjølv om dette har vore heilt nytt for oss, har det fungert svært bra. For samstundes som at det endelege resultatet blir heva, blir også arbeidsmiljøet langt betre. Bruk av sentralstøvsugar er heilt klart framtida i vår bransje, meiner Elde.

Brorparten av det nye bygget er bygd oppå det gamle sjukehuset og det eksisterande bygget var berre delvis dimensjonert for ein etasje til.

- Difor har vi vore nøydde til å gå inn med lette konstruksjonar. Vi har brukt stålkonstruksjonar oppå eksisterande bygg, seier Elde.

250 søyler er montert gjennom eksisterande tekking. Det baud på utfordringar, særleg med tanke på å unngå vasslekkasjar.

- Etter at vi hadde sett opp søylene måtte det framleis vere heilt tett til vi hadde fått på plass konstruksjonen.

Det blei løyst på følgjande måte:

- Først skar vi hol i tekkinga, så bretta vi opp takfolien og tok vekk isolasjonen som låg under. Deretter sette vi ned stålsøyler med fotplate på før vi bora ned fire boltar i eksisterande betongdekke. Så la vi på plass igjen isolasjon inn mot søyla. Tekkinga vart lagt inn mot det igjen, før vi til slutt la ekstra tekking, forklarar Elde.

Og resultatet? Null lekkasjar.

- Det var pottetett, sjølv om vi hadde ein forferdeleg haust med mykje nedbør. Men heldigvis var vêret ikkje på det verste då vi gjorde dette.

Men litt vanskar med lekkasjar har dei likevel hatt under byggearbeidet.

- Vi har hatt elendige vêrtilhøve nesten heile tida, og vi har fått testa oss mot store nedbørsmengder. Men vi har ikkje hatt store lekkasjar som har gått utover drifta i sjukehuset, seier Elde.

Arbeidarane er i innspurten av byggearbeidet. Dei nye delane av sjukehuset skal etter planen takast i bruk i byrjinga av april.

Luftig og lyst

I dei tre nye lamellane er det lagt opp sprinkelanlegg som brannsikring og oppvarming skjer med vassbåren varme. Fasademateriala er tilpassa eksisterande materialbruk ved sjukehuset. Utvendig er det mellom anna brukt fasadeplater i metall i ein mørk tone. Glas utgjer også ein viktig del i den nye fasadane. Takkonstruksjon er i lettakselement. Naturmaterial skal nyttast som innslag i interiøra, og fargebruken vert utvikla på ein måte at den det gjer det lettare å orientere seg i bygget.

- Utstrekt bruk av glas i fasadar vil skape eit lyst og luftig preg. Planløysinga gir dessutan oversiktelege avdelingar med klare trafikklinjer, og dei opne fellessonene for pasientar og personale ligg strategisk plassert med godt utsyn til parken, seier arkitekt Jørn Atle Flo i arkitektfirmaet Origo.

Aksepterte bråk

Prosjekt- og eigedomsdirektør Oddbjørn Schei ved Førde sentralsjukehus ser fram i mot å ta i bruk dei nye avdelingane ved sjukehuset. Han tykkjer både dei sjukehustilsette og pasientar har takla anleggsarbeidet godt.

- Sjukehuset er nesten 30 år gammalt og det har vore brei semje om at det har vore naudsynt med ei oppgradering. Behovet for meir areal, først og fremst med tanke på daghandsaming og kontorplassar til legar, har vore stort, seier Schei, som er glad for at byggearbeidet no går mot slutten.

- Men sjølv om vi har opplevd ein del forstyrrande element i byggeperioden, har dei tilsette ved sjukehuset sett fram til dette i så mange år at dei har akseptert litt bråk over ein periode, seier Schei.

- Dei tilsette ved sjukehuset har vore fantastiske og synt stor forståing. Vi har hatt ein god dialog under heile prosjektet, legg Einar Elde til.

Betrar sjukehustilbodet

I dag finst det førebels ikkje planar om vidare utviding, men dersom behovet for endå meir areal skulle melde seg på ny hjå sentralsjukehuset i Førde, er det framleis høve til å bygge ut.

- Den eine av dei tre nye lamellane toler ein etasje til, og i tillegg gir sjukehuseigedomen oss moglegheiter for vidare utviding ved seinare høve, seier Schei.

Arbeidet med Førde sentralsjukehus har pågått sidan mai 2004 og er gjort i delt entreprise. Helse Førde har leigd inn bergensverksemda Erstad og Lekven Bergen AS som fagleg leiing i prosjektet. Svært mange lokale handverkarar har vore med i byggearbeidet. Det har vore slått heldig ut, meiner prosjektleiar i Erstad og Lekven, Leon Fauske.

- Vi er veldig nøgde med kvaliteten på handverksjobbane som er gjort. Eg trur dessutan at lokale handverkarar ofte snakkar betre saman enn folk som ikkje har jobba med kvarandre tidlegare, avsluttar Leon Fauske.

Arkitektfirmaet Origo har lagt vekt på å skapa ein ny lys hovudinngang.

Tiltakshavar, prosjekterande og utførande

Tiltakshavar: Helse Førde HF

Prosjektleiar: Erstad & Lekven Bergen AS

Byggeleiar: Erstad & Lekven Bergen AS

Arkitekt: Origo Arkitektgruppe AS

RIB: Rambøll Norge AS

RIV: Opticonsult AS

RIE: Opticonsult AS